Bazar Mettler

Entschuldigung für Probe

Mii Hals isch root und brännt
s’weiss jedä wo das kännt
das äs nüd tued bringä
wenn ich chäm go singä

Letschti Prob 2009

Diä Fahrt mid Autobus und Dampf
isch sicher gsii kei grossä Chrampf
und laufä isch bekanntlich gsund
drumm isch au niemer uff em Hund
d’Schtellwärchfüehrig interässant
für villi gänzlich unbekannt
Schteischtägä schtiigä das isch Gift
drumm simmer ufä mid em Lift
ä Apero i dem Gebüü
isch au für ne Bähndler nüü
vill hend gschetzt das Programm sehr
sii hend wider einisch gha Verchehr
zwar öffentlichä, doch sehr entschpannt
und dezuä nu interessant
dä mobili Teil isch jetz verbii
jetzt wemmer nur nu zämä sii
chli trinkä und dezuä nu singä
und üüs i Feriäschtimmig bringä.

Präsentation

Bim Militär da hed mer Battä
bi üsem Chor Vereinsgrawattä
dezue äs Hämli wo isch wiis
gletted vu de Frau mid Fliis
dezue ghört nu, tönd jetzt guet losä
au nu s’paar tunkli Sunntigshosä.
Gänd mier irgendwo äs Schtändli
chund einä mid em Übergwändli
dä einti hed ä Pulli aa
mid emä Rollchragä draa
de wo d’Grawattä nid hed gfundä
hed ä Schärpä umäbundä
är nid das locker, nid so gnau
de wo chund mid Hämli blau
dä Grawattäschpänder Robi
chund sich sicher vor we Globi
är tued öppis üs schpändierä
und mier tönds nid presäntierä
drumm seid sich jedä jetzt im Chor
bi mier chund das jetz nümmä vor.

Geschäftsübergabe Holzbau Schmidlin

Hinicht singid mier ganz schtolz
für de Scheff vu Schmidli Holz
zrugg gaad är is zweiti Gliid
är weiss, dass das jetz dinnäliid
tued s’Gschäft am Sohn jetzt aavertruä
äär söll ab jetz für d’Chundä buä
Röbi he, du jungä Altä
jetz chasch äntlich abäschaltä
am Morgä nümmä früeh uufschtaa
au wemer fascht nid andersch chaa
ja herrlich, bis am achti bachä
und de langsam s’Zmorgä machä
am nüüni chund ä jungä Maa
wo Fahnäschwingertips wott ha
am zähni wetsch de s’Auto pumpä
doch äs chund äs Grosschind z’gumpä
muesch Chinderwelo Länker richtä
jaa das sind halt Grosstädipflichtä
am zwölfi de zum Ässä schtartä
de mer tued jetzt nümmä wartä
d’Abwäschmaschinä füllä braav
anschtatt ä churzä Mittagsschlaaf
am eis lütet de Thomas aa
mer sötti dich im Gschäft schnell haa
gasch ufä nachhär d’Händ go wäschä
de gid diär s’Vreni Poschtitäschä
zum Beck und Spar muesch gaa bigoscht
und au nu midemä Pack uff Poscht
jetz schnell ä Schtangä, wotsch chli Rueh
gopferteckel d’Beiz hed zue
so gasch de hei i Chäller schnell
und nimmsch äs Bierli abem Gschtell
gasch i d’Chuchi nimmsch äs Glaas
seid s’Vreni scho, was isch de daas
hesch’s du wirklich ganz vergässä
um diä Ziit tönd mier doch ässä
am halbi achti ganz genau
luegt mer zämä d’Tagesschau
schlaaft schier ii und tänkt mer sett
eigentlich scho jetzt is Bett
mer teckt sich zue und tänkt debii
we schön isch äs doch früehner gsii
doch äs vergahd ja nu chli Ziit
bis das alles isch sowiit.
mier wünschid, alles mögi glingä
und tönd jetzt nu äs Lied diär singä

Fischpicknick 2.Bass

Fischpicknick oder Fondügschpass
sisch öppis los bim zweitä Bass
hüt nid komplett, de zwee sind furt
defür ä nüä, üsä Kurt
diä anderä diä sind alli daa
und chömid jetzt äs bitzli draa.
ä Thiitscher us em Urnerland
mid Sigärettä i de Hand
als Dirigänt da isch är Vieze
kännt da und det ä blondi Mieze
ä Oberhuser sisch kei Schärz
hed Problem gha mid em Härz
macht grossi Augä und gsed’s gärä
wenn ä gschpannti Atmosphärä
dä Fischschpänder weiss genau
vum Fondüässä wird mer blau
als Sänger immer voll debii
sii Schterchi dass isch d’Melodii
de hemmer nu ä Maa vum Nordä
pangsioniert isch är jetz wordä
kännt i dä Gmeind fascht jedi Frau
isch Schponsor bi dä AH Vau
dä wo vorä rächts bim singä
isch fascht nid us dä Rueh uszbringä
au wenn är hed ä Zahnd verlorä
sig är bim Dessär glich ganz vorä
dä mid em Hörgrät und dä Brüllä
täg au nu sälber Wii abfüllä
all Schprachä singä tued nid weh
ussert s’Lied vieux chalet
ä nuä Maa, für üüs äs Pluss
ja wenä Baum wo hangid Nuss
ganz nüi Hobby hend diä Frischä
tönd z’Lauerz i dä Schtubä fischä.

s’Schtändli

Fiirsch ä Geburtstag du,ä rundä
fasch nacherä Chranket afä gsundä
oder wirsch sogar Major
de chund zu dier de Männerchor.
du freusch dich de uff vierzig Maa
doch leider sind nur drizäh daa
dä einti muess deheimä mischtä
de anderi mid de Frau uff Pischtä
einä de muess d’Grosschind hüetä
de vierti de hed’s Nasäblüetä
s’mönd au ä paar nu umefluechä
will sii mönd d’Grawattä suechä
au s’wiis Hämmli isch nid daa
drumm leid mer halt das blaui aa
Fänschter muess de eint nu malä
de anderi nu Schtüürä zahlä
mid em Hund muess mer go laufe
de Sunntigsbratä nu iichaufä
d’Grossmuetter muess de einti bsuechä
und de ander d’Feriä buechä
abgmacht hed mer doch zum jassä
und wott de Slalom nid verpassä.
vill vu denä chlinä Sachä
chönt mer doch au schpeter machä
wenn käs Schtändli mier hend vor
mid üsem grossä Männerchor.
Singt mer bi dier, wär das de Fall
ghörtisch du, au gärä all.

Letschti Proob 2006

Wie herrlich ist es doch das Singen
man kann damit viel Freude bringen
mal singt man solo, mal im Chor
auch beim Duschen kommt’s oft vor.
Montag’s singt man in der Aula
geht erst Dienstag dann zu Paula
wenn’s mal nicht klappet beim Tenor
singt’s die Dirigentin vor.
Auch beim Segeln kann man Singen
und so die Freud zum Ausdruck bringen.
Singt man mit dem Frauenchor
ist konzentriert man im Tenor
volle Stimme jetzt, nicht matt
und kein Blick für’s Notenblatt.
Singt auf der Rigi, schön und laut
der Kapuziner ist erbaut
Singt auch mal in der Kaufmann-Halle
und dies begeistert wirklich alle.
Singt freudig auch für Jubilaren
die in unserm Chor mal waren.
Singt im Advent in Altersheimen
sonst würd sich dieser Vers nicht reimen.
Singt man das Lied von der Forelle
ist das Alter bald zur Stelle.
Um zwölfe nacht’s im Freundeskreise
singt man meistens nicht sehr leise
man ist dann auch noch irritiert
weil ein Lehrer dirigiert.
Bei der letzten Prob wie heute
singt man nicht für fremde Leute
nur für Sänger aus dem Chor
s’kommt jedes Jahr nur einmal vor.
drum muss man uns jetzt auch nicht zwingen
das wir Montanara singen.

Segeltörn im Jisselmeer

Am sächzähtä nüntä im Apertogartä
tömmer am Abig uff d’SBBe wartä
ä Gruppäfotti wott mer nu schtartä
muess aber nu ä Lehrer abwartä
über Basel gads de uff Amschterdam
es schüttlet im Zug we imene Tram
ei Sänger hed das überhaupt nid schiniert
im Schpiiswagä bis am zwei hed är Notä archiwiert
de Liegewagä hemmer scho glii müessä verlah
um midemä Bummler zum Eisselmeer z’gah
vum Bahnhof zum Schoner tued alles guet gigä
und scho glii chömer all d’Amazonä beschtigä
mid Seemannslieder überrascht üs ä Chor
das chund det sicher nid all Tag vor
überunä d’Kojä schnell inschpiziert
und scho wird mer dobä inschtruiert
hopp Sägel setzä, nid erscht moorn
suscht chömid mier de niä uff Hoorn
scho glii chund d’Rina wider z’düüsä
he Sägel abä, wäg de Schlüüsä
ja miär sind absolut topfit
will mer d’Probä machid mit
mid uufschtah,sitzä,uufschtah sitzä
bringt mer üs det au is schwitzä
am nächschtä Tag vill Wind und ruuschä
a Maa mid Schnauz wett öppis tuuschä
dä Chuchitiger söll uff Deck
und d’Rina abägah zum Bschteck
diä eintä hend ä bsunderä Trick
bi dä Überfahrt nach Medemblik
schtatt Sägel uufzieh machids liebär
im Schpiissaal unä drii, viär Schiebär
dä Taag zwee Toni am Rueder gsii
ä Schlosser und ä Stromer au nu debii
ab äm Seilbahnbuer sind mier ganz baff
är chlädered umä fascht wenä Aff
ä Gärtner, nümmä ganz so jung
probiert ä nüä Relingsschprung
är rutscht uus uff nassem Ladä
und wär nu bimenä Haar go Badä
de Choch tued all Tag üs verwönnä
drumm tömmer imm ä Friitag gönnä
zwee hübschi Frauä als Ersatz
übernämid jetz de Chuchiplatz
de Schtromer de vergisst jetzt s’Rueder
treid Gschiir i d’Chuchi, ganzi Fueder
uff einisch hends au ander schträng
i dä Chuchi wird’s jetz äng
machsch i Tschiins du z’Nacht ä Mosä
de treisch am Morgä churzi Hosä
und will’s im Chopf ä chli tued trüllä
hesch uff de Nasä d’Sunnäbrüllä
uff Deck wird gsünneled ohni z’dürschtä
mer redt vum ässä und vum…..schaffä
mier hend ä Flautä, s’gahd nid gschwind
nur d’Amazonä hed kei Wind
nach em letschtä Abigässä
darf mer s’trinkä nid vergässä
schlaaft ufem Bank, ja das isch geil
de d’Schtägä abä isch so schteil
bim Zmorgäbüffee wird nid gschpahrt
will mer nachhär heiwärts fahrt
am Seckelmeischter macht’s kei Sorgä
äär trinkt scho zwei Bier zum Zmorgä
nu schnell ä Fotti, sisch kei Witz
de Gipser de isch zimli schpitz
fühlt sich uff einisch zimli grooss
mid de Rina uff de Schooss
zwei Brödli gschtrichä für uff d’Reis
de Presi findet das ä Scheis
doch im Zug da wär är froh
wenn är s’au i Sack hätt gnoh
d’I C E – Fahrt mid drühundertdrüü
isch für villi scho chli nüü
egal cha diär das Tempo sii
wenn du mid pfuusä hindädri
wer bi dem Törn isch gsii debii
seid, äs isch doch super gsii
äs Seemannslied wär jetz nid ohni
zur Erinnerig, meint de Stürmaa Toni

Presidänt Bruno

Ich brichtä hüt und s’macht mer Schpass
vu menä Maa im erschtä Bass
sitzt immer i de Reihä zwei
mag fascht nid z’Bodä mid de Bei
muess nid bi allne Probä sii
d’Absänz treid är ja sälber ii
sii Uftritt isch am viertel vor
schtaad de läässig vor em Chor
tued üs begrüessä wen är daa
gid Terminä und blaa blaa
scho am nüni tued är plangä
uff diä obligati Schtangä
tänkt au nu a de Dunscht de blau
mid dem schtützt är doch d’AHVau
är hed nu Äntä für de Rasä
ghört gärn de Nachbuur Alphorn blasä
mid Sanitin handelt sii Pappa
doch är stahd eher uff ä Grappa
obwohl inn doch fascht jedä kännt
schtell ich ne vor, de Presidänt.

Männerchor

Nimmst du dir was neues vor
dann komm in unsern Männerchor
ob Notenkentniss oder nicht
nur Kameradschaft ist uns Pflicht
sicher wird’s dir Freude bringen
in unserm Chore mitzusingen

Liebst hohe Stimmen du im Ohr
wärst du richtig im Tenor
sind diese Stimmen dir zu krass
wähl ersten oder zweiten Bass
sicher wird’s dir Freude bringen
in unserm Chore mitzusingen

Jede Woche einmal singen
hie und da ein Ständchen bringen
und auch mal an Sängerfesten
unser Können richtig testen
sicher wird’s dir Freude bringen
in unserm Chore mitzusingen