Bazar Mettler

Radfahrer RS 1964

I dä RS vu de Redlibuebä
hed’s de gar nüd gäh vu gruebä
de Kadi luuret überall
z’Winterthur im Rösslischtall
au de Muetter vu de Kompanie
fallt all Tag nu öppis frisches ii
diä erschti Wuchä und diä zweiti
hänksch Zungä usä über d’Breiti
au mid secklä muesch du büessä
wenn de Korpis nid tuesch grüessä
z’Nacht im Bett hed mer dich gfundä
wenn d’Väntil nid gsii sind undä
obä ohne cha mer üs gseh
verussä chalt wäschä au bi Schnee
hesch uff de Schiisi ussä pafft
teilt mer dich ii zur Fassmannschaft
bisch z’lang im Walfisch uff de Pischtä
chunsch am anderä Tag i d’Chischtä
isch d’Usgangsmützä obä flach
darfsch defür uff d’Sunntigswach
isch äs chalt, nid numä chüel
glich muess mer schiessä im Orbüehl
mid UG, Schprängrohr und au Rack
handierid mier im grüenä Frack
d’Expo hemmer au nu bsuecht
am Schluss hed üsä Kadi gfluecht
d’Achtigschtellig laad är fallä
will diä meischtä chli tönd lallä
i de nöchi vo Schaffhuusä
tömmer i de Verlegig pfuusä
z’Wilchingä a dä Gränzä schier
im Wiigebiet, doch s’gid au Bier
sind au gsii bim Haueschtei
i Urlaub isch’s det au wiit hei
scho isch är da, de letschti Taag
mer hed druuf planget, gar kei Fraag
und fahrid soo, als letschtä Schrei
mid em Velo au nu hei.