Bazar Mettler

Goldau „üses Dorf“

Verbii sind scho zweihundert Jahr
drumm tänkt mer nümmä a diä Gfahr
vum Bärg wo s’alt Dorf zueteckt het
vu imm wird hüt fascht nümmä gret
mid Schtei wo sind mit abächo
hed mer ä Buu i Aagriff gnoh
d’Pfarrchilä mid Turm ganz höch und breit
und hed sii am Härzä Jesu gweiht
zmizt im Dorf ä Platz nu isch
aazluegä wenä Tintäfisch
de Bahnhof mid de vilä Gleisä
wo füehrid eim uff schöni Reisä
im Hinderdorf da isch äs Gländ
wo alli Chind gärn anäwänd
chasch Bärä gseh und Schteibock mängä
Mufflon und Hirschä gar aalängä
i d’Tännmatt schtellt mer Hüser drii
ûnd is Chrähli d’Induschtrii.
Uff d’Rigi cha mer mid de Bahn
sii schtiigt detufä Zahn um Zahn
üses Dorf ghört zur Gmeind Arth
we s’Nachberdörfli Oberarth.
Ich sägs a jedem ganz genau
bi gärä daa,im Dorf Goldau.