SBB-Rückblick
Annä zweiäsächzgi am erschtä Mai
gah ich am Morgä furt vu dehei
z’Goldau uff em Bahnhof cha mer mich gseh
mii erschti Tag bi der S B Be
Überchleider hed’s nu keini gäh
diä hed mer müessä vu deheimä mitnäh
isch Probeziit verbii und isch alles guet
git’s äs blaus Übergwändli mid Wätterhuet
dä erschti Tschopp chund nid allnä glägä
will mer muess butzä d’Personäwägä
Schiibä wäschä und Holzbänk abschtaubä
isch nid de Hit,dass chönd er mier glaubä
ändi Monet bim Zahltag chunsch fascht is Wankä
mid Zuelagä gid äs füfhundertachtzg Frankä
de han ich mich beworbä für’s Perron-Gepäck
au det isch’s nid immer gsii ä Schläck
Chalber uusladä und Gofferä verschtauä
dä Fahrplan erklärä dä altä Frauä
Perron wüschä, Papier zämänäh
a jedem zweitä ä Uskunft nu gäh
Nachtdienscht macht mer imm Güeterschuppä
zämä mid dä Brunner Lagerhuus-Truppä
am Afang kei Schtapler und Hubwagä kännt
nur mid Handwägä und Sackchärä umägrännt
annä vieräsächzgi drii Monet z’Prattälä gsii
de ganz Tag heds gschtunkä vu de Ciba-Geigerii
zrugg de uff Goldau, diräkt is Ranschier
als Ablöser simmer det üserä vier
schpeter de fescht inä Gruppä cho
ä drii Schichtä-Betrieb i Agriff gno
Wägä heds tue im Überfluss gha
also gnueg Arbet für alli drissg Maa
nach fascht zwänzg Jahrä bi derä Hordä
bin ich Ranschiergruppäfüehrer wordä
schpeter de Vorschlag zum Meischter überchoh
das Amt hätt ich ganz gärä übernoh
doch churz vor de Wahl ä grossä Fruscht
wägg vum Ranschier, wägem Ghörverluscht
zäh Täg vor de Wiehnacht passiert de Scheis
was macht mer mid eim, wo nid darf is Gleis
Im Jänner heds de ä Lichtblick gäh
s’Magazin vum NF chan ich übernäh
de Iischtiig isch happig und packt mich am Wickel
bis ich si kännä, diä x-hundert Artikel
Bschtelligä all mid dä Schriibmaschinä gschribä
immer drii Durchschleg sisch nid übertribä
bis mer mid em Computer chönd schtartä
hemmer ä Ewigkeit müessä wartä
nachem Meischterwächsel tued sich einiges wiisä
mer züglid det usä will mer nümmä cha ziisä
au mönd diä eintä de NF verlaa
d’Reorganisatzion wotts halt ä soo haa
SW und NF heisst nur nu E L Te
ooh wenn das nu dä Fälder hätt gsee
NF – Lüüt immenä Röleruum debii
das wär de früehner ä Todsünd gsii
für mich heds nüs gäh, ä ganzä Huffä
nummä glich blibä, isch mi Funkzionsschtufä
mittlerwilä tued mer im Tiim sich guet kännä
doch chönt äs sii, das mer sich wider muess trännä
doch ich tue das sicher nümmä erfahrä
ich schtiigä uus, nach vierävierzg Jahrä
ich wünsch üch, bliibid eister zwäg
uff üchem Iisäbähndlerwäg.
Keine Kommentare Geschrieben am 13. 04. 2006.
Segeltörn im Jisselmeer
Am sächzähtä nüntä im Apertogartä
tömmer am Abig uff d’SBBe wartä
ä Gruppäfotti wott mer nu schtartä
muess aber nu ä Lehrer abwartä
über Basel gads de uff Amschterdam
es schüttlet im Zug we imene Tram
ei Sänger hed das überhaupt nid schiniert
im Schpiiswagä bis am zwei hed är Notä archiwiert
de Liegewagä hemmer scho glii müessä verlah
um midemä Bummler zum Eisselmeer z’gah
vum Bahnhof zum Schoner tued alles guet gigä
und scho glii chömer all d’Amazonä beschtigä
mid Seemannslieder überrascht üs ä Chor
das chund det sicher nid all Tag vor
überunä d’Kojä schnell inschpiziert
und scho wird mer dobä inschtruiert
hopp Sägel setzä, nid erscht moorn
suscht chömid mier de niä uff Hoorn
scho glii chund d’Rina wider z’düüsä
he Sägel abä, wäg de Schlüüsä
ja miär sind absolut topfit
will mer d’Probä machid mit
mid uufschtah,sitzä,uufschtah sitzä
bringt mer üs det au is schwitzä
am nächschtä Tag vill Wind und ruuschä
a Maa mid Schnauz wett öppis tuuschä
dä Chuchitiger söll uff Deck
und d’Rina abägah zum Bschteck
diä eintä hend ä bsunderä Trick
bi dä Überfahrt nach Medemblik
schtatt Sägel uufzieh machids liebär
im Schpiissaal unä drii, viär Schiebär
dä Taag zwee Toni am Rueder gsii
ä Schlosser und ä Stromer au nu debii
ab äm Seilbahnbuer sind mier ganz baff
är chlädered umä fascht wenä Aff
ä Gärtner, nümmä ganz so jung
probiert ä nüä Relingsschprung
är rutscht uus uff nassem Ladä
und wär nu bimenä Haar go Badä
de Choch tued all Tag üs verwönnä
drumm tömmer imm ä Friitag gönnä
zwee hübschi Frauä als Ersatz
übernämid jetz de Chuchiplatz
de Schtromer de vergisst jetzt s’Rueder
treid Gschiir i d’Chuchi, ganzi Fueder
uff einisch hends au ander schträng
i dä Chuchi wird’s jetz äng
machsch i Tschiins du z’Nacht ä Mosä
de treisch am Morgä churzi Hosä
und will’s im Chopf ä chli tued trüllä
hesch uff de Nasä d’Sunnäbrüllä
uff Deck wird gsünneled ohni z’dürschtä
mer redt vum ässä und vum…..schaffä
mier hend ä Flautä, s’gahd nid gschwind
nur d’Amazonä hed kei Wind
nach em letschtä Abigässä
darf mer s’trinkä nid vergässä
schlaaft ufem Bank, ja das isch geil
de d’Schtägä abä isch so schteil
bim Zmorgäbüffee wird nid gschpahrt
will mer nachhär heiwärts fahrt
am Seckelmeischter macht’s kei Sorgä
äär trinkt scho zwei Bier zum Zmorgä
nu schnell ä Fotti, sisch kei Witz
de Gipser de isch zimli schpitz
fühlt sich uff einisch zimli grooss
mid de Rina uff de Schooss
zwei Brödli gschtrichä für uff d’Reis
de Presi findet das ä Scheis
doch im Zug da wär är froh
wenn är s’au i Sack hätt gnoh
d’I C E – Fahrt mid drühundertdrüü
isch für villi scho chli nüü
egal cha diär das Tempo sii
wenn du mid pfuusä hindädri
wer bi dem Törn isch gsii debii
seid, äs isch doch super gsii
äs Seemannslied wär jetz nid ohni
zur Erinnerig, meint de Stürmaa Toni
Keine Kommentare Geschrieben am 09. 04. 2006.